潮流興開概念店，香港電訊都開咗間以IoT（物聯網）為主題嘅概念店，噚日喺圓方正式開幕。間舖頭成5,200呎夠晒大，入面設有不同專區，有好多高科技產品畀大家試玩。如果試啱，現場有大部份產品都可以直接買返屋企。
例如話EPSON呢副透視型智能眼鏡，外表睇落平平無奇，但一副竟然賣成6,000幾蚊。聽聞副眼鏡主要係追蹤運動軌跡，尤其係近年好興嘅航拍，航拍機拍到嘅影像，用家都可以喺眼鏡度睇到。
一戴副眼鏡，鏡片中間就係個屏幕仔可以影到影像，仲要支援AR擴增實景，所以成個感覺好真實，又有少少放大鏡嘅感覺。
最搶眼嘅，非Samsung部VR Chair莫屬。叫得VR Chair，就緊係畀大家體驗下VR（虛擬實境），張凳仲會配合個畫面郁動。譬如試玩過山車、坐快艇等刺激遊戲，過山車向前滑落時真係會有離心力，十足十玩真嘅過山車咁，難怪張凳上面要有幾條安全帶。但部機就無得賣，有興趣嘅朋友記得去試下。
香港電訊集團董事總經理艾維朗都話，新舖屬試驗性質，都唔知成功定失敗，但就算要冒商業風險都好，都希望通過間概念店畀社會大眾試驗新技術，仲話會努力搜羅唔同品牌嘅產品畀大家體驗喎。