有網民喺網上LIHKG討論區上載一段2013年外國「Swoldier Nation」健身短片，片中大隻男展示身上紋身時除咗簡體字「德科达」，同時驚見「劉慧卿」3個中文繁體字，短片瞬即瘋傳，唔少網民議論紛紛，呢個莫非係卿姐嘅「秘密情人」？定係佢「勾結外國勢力」嘅有力證據？八方噚日打畀卿姐，未開口問佢已知道紋身事件，話噚日朝早不停收到新聞界、朋友、年輕人傳來嘅大隻佬紋身照，一貫霸氣回應：「老實講，我哋呢啲，乜都見過啦，哈哈哈……」所以收到時嘅反應係「定過抬炸彈」。
卿姐笑言今次應該係首次有人將佢嘅中文名紋喺身，「我知嘅係第一次，哈哈，真係好奇，我自己都未紋落去，我都唔知佢點解？」
佢話知道網上有文章分析，話該大隻佬因為有女友叫「Emily」，有人就建議紋「劉慧卿」中文字，卿姐坦言唔識分真假，「因為都冇人搵到嗰個人（大隻佬）」，「我無緊要，咪喺度笑吓囉」。
大隻佬係咪佢男朋友、以及係咪勾結外國勢力？佢當然笑住一一否認，個人仲估計紋身所指嘅「劉慧卿」真有其人，係有另一同佢中文名字相同嘅人，「即係佢真係識得有個劉慧卿，但就唔係我，你哋個個就表錯情，所以你哋快啲去搵一搵佢啦！」若然搵到片中大隻佬，卿姐話唔介意同對方合照，「我諗佢都嚇死」，「最好搵埋佢（大隻佬）指嗰個劉慧卿出嚟，因為劉慧卿都有好多個」。
疑譯錯Emily出事
雖然至今仍未能解構大隻佬嘅「愛的密碼」，但睇返卿姐英文名係「Emily」，如果喺Google繙譯將「Emily」譯做中文，繙譯選項首項係「艾米莉」，第四個就係「劉慧卿」；如果打Priscilla，第一個繙譯建議竟然係「梁美芬」，即係佢英文名。
由此推斷，可能大隻男想紋「Emily」嘅中文字上身，唔排除係Google大神幫佢天賜良緣揀咗「劉慧卿」。
李八方