陳山聰曾經同何超雲愛得轟烈，同老婆Ponny Yeung離婚都要同超雲一齊，2013年佢同超雲分手之後，陳山聰被人笑係「四失聰」，事業、金錢、愛情同形象一鋪清袋。經過多番努力，陳山聰終於爬番起身，仲識到任職美容顧問嘅女友Apple，話過一定會畀名份女友，唔排除閃婚。有周刊直擊佢日前靜雞雞去買求婚戒指，莫非真係好事近？
重一卡半鑽石
報道指日前陳山聰到尖沙嘴一間首飾名店揀鑽戒，來回睇咗好多轉，睇吓又戴吓咁，當時佢睇啱嗰隻係價值15萬、鑲咗一卡半鑽石嘅戒指，報道仲引述陳山聰密友講，陳山聰視Apple為終身伴侶，打算明年初完成手頭工作之後，就飛去外地旅行結婚。
陳山聰被問到揀婚戒係咪好事近，佢就回覆傳媒話：「睇吓啲鑽石戒指有幾貴啫，要再努力啲，再加油先得，有最新消息一定公佈。」而佢位好友郭政鴻噚日接受本報訪問，被問到陳山聰嘅婚期時話：「如果係就真係恭喜佢呀！但真係冇聽過喎，佢咁大個人感情事到合適階段自然會做，但佢真係冇同我講過。」
撰文：馮仁昭
