突然同大隻佬扯上關係嘅卿姐，噚日轉個頭就同兩名主播男神開餐，邀約盛傳將出任政制及內地事務局政治助理、現職無綫電視首席記者嘅吳璟儁以及盛傳出任食物及衞生局政治助理，人稱「蘇B」嘅港台《城市論壇》主持人蘇敬恆喺半島酒店食晏傾偈。卿姐話佢兩位一坐低，酒店部長已經認出兩人話：「佢哋就嚟做官吖嘛！」
卿姐席間除咗向兩人贈咗句「一入侯門深似海」，仲寄語兩人入熱廚房後守住底線，「唔好做一啲違背良心嘅嘢」，「我同佢哋講，如果真係唔掂，你咪走人囉，你又咁後生，有乜緊要？」佢話唔會覺得兩人選擇加入政府就變衰人，請兩人食飯除咗因為兩人都來自新聞界，亦因為認識兩人，唔覺佢哋係壞人，「其他人我真係請都唔請啦！邊度得閒呀！」