上回講到國指同一堆上半年超落後嘅大價藍籌蓄勢待發，準備破頂，只欠業績呢股東風。果然話口未完，內銀加國指已經輕鬆率先突破年內新高，仲大幅跑贏恒指。內銀黎緊30號派成績表，斷估唔會差得去邊，換句話講，內銀有排未到頂，有貨可繼續揸住先，設止賺位，將止賺位慢慢推上，食盡個浪。
再睇返中海油（883），上星期業績省鏡，2017年半年虧轉盈，賺162.5億人民幣。最重要嘅桶油主要成本降到31.74美元一桶，以現時國際油價喺40至50美元上下浮沉，中海油基本上下半年會穩賺而且封蝕本門。上半年中海油股價低位橫行，很大程度上為擔心低油價會繼續拖累長遠盈利表現，現時業績一出，過往憂慮實為杞人憂天，中海油好可能會喺下半年嚟個價值重估。再加上今次中期息派20港仙，比上年同期大升67%，如果嚟緊全年業績維持派23港仙，保守估計現價息率達4.6厘，咁嘅背景之下，中海油實為進可攻退可守嘅上上之選，長遠追落後上返10蚊應該無難度可言。
都係嗰句，今個升浪升咗咁耐，資金仲係輪流炒，不過只限大價股。所以要追落後都要識揀，細價股對我嚟講，就可免則免。