今屆港姐可以話係零人氣，以前就話有鬆踭爭排位博上鏡爆後台又或者收兵，現時就係靠淘汰佳麗出局同埋做直播宣傳。日前拎咗個「美麗觸角大獎」獎嘅何依婷，同其他佳麗一樣成日開直播，報稱23歲、從事金融服務顧問，人氣都唔錯，獲樂易玲點名讚佢表現談吐進步好多。
網民都有幫Regina起底，包括話佢有家底，經常周遊列國，仲熱愛晒名牌，仲有指佢年前同男友分手後更加富貴，狂收名牌，被指另結有米新歡。咁究竟佢係有錢女，定係另結有米新歡？
昨日有報道指Regina其實係出身基層，曾住黃大仙公屋，後來同家人搬去深水埗一幢40年嘅唐樓，絕非傳聞中嘅富家千金。但Regina都好爭氣，一直努力讀書，入城大修讀商業管理，且每年考試都成績優異，仲以一級榮譽畢業。所以Regina每次開直播，通常都係指定嗰兩個位，一係梳化，一係窗簾前，睇慣咗如果「轉場」反而唔慣。