政府新聞處處長黃智祖（Joe，圖）九霄驚魂？好在佢只係模擬揸飛機，唔係現實中變咗飛機師！
阿Joe噚日應邀出席東華三院嘅傳媒午宴，現場有唔少攤位畀嘉賓試玩，佢對東華三院鄧肇堅小學嘅「翱翔TEEN際」攤位好有興趣，呢間小學喺2015年起開展「小小飛機師計劃」，喺校內增設模擬飛行訓練室，邀請飛機師親臨學校教授飛行理論同氣象學知識。阿Joe亦即場過吓飛機師癮，雖則冇「Sam哥」咁型，但至少順利完成航程，難怪佢玩完都笑笑口話好在冇撞機。
適逢今日係東華三院賣旗日，東院主席李鋈麟呼籲大家多多益善，少少無拘。今年佢哋特別搵嚟年輕插畫師Hello Wong設計紙旗，以得意插畫喚醒大家對弱勢社群嘅關注，亦希望吸引更多年輕人做善事！