早前Uber大幅加價，旗下幾款車嘅最低車資加咗三至八成，轉過頭，佢哋就推出「UberSENIOR長者日」優惠喎。
Uber宣佈，由9月至12月，每個月1號嘅上午11點至下午4點，65歲或以上長者搭Uber可以每程平50蚊。
香港區總經理佘雋知話，老人家近近哋出街飲茶，50蚊就夠晒cover車費，同一日最多有兩程優惠，仲啱啱夠來回㖭。
老人家未必識用手機App唔緊要，佘雋知諗埋㗎喇，話仔女可以幫手call車，或者分享同一個account幫老人家畀錢，call車時要輸入「UBERSENIOR」兼且畀司機睇長者證，只要嗰程車有一個乘客係65歲或以上嘅長者，就可以用呢個優惠。
不過，諗真啲，呢個推廣只得4日有呢個優惠咋。