踏入30歲嘅韓國女團FIESTAR中國成員曹璐，去年演出綜藝節目《我們結婚了》時憑直率性格而獲得關注，之後邀約不斷頻頻現身唔同節目，不過早前佢拍攝節目《白鍾元的快餐車》時表示自己出道5年零收入，透露辛酸嘅歌壇之路。
曹璐表示：「雖然自己憑綜藝走紅，亦有各種活動邀約喺手，但仍然一直體會到生存危機意識。」續指：「其實我除咗做藝人就咩都唔識做，連最簡單嘅打字都唔叻，根本冇可能好似普通人咁去公司上班。但藝人呢個職業太唔穩定，跟公司嘅合約明年到期，覺得自己應該做個生意，以防萬一。」
曹璐又指出道咗5年，但實則零收入，完全係靠對演藝事業嘅熱情而撐落去：「我真心想賺錢，我30歲喇，但每個月嘅零用錢只有50萬韓元(約3,500港元)，根本無法保障明年會變成點。去年我真係好忙，但我亦明白冇可能一世都咁忙，我清楚明白當形象被消磨完，就唔會再有人搵我。」
雖然曹璐講到自己好慘，出道多年都賺得唔多，但就有心水清嘅網民指佢曾喺另一節目透露自己17歲已經喺北京買咗兩個物業，現時房價漲咗10倍嘅事，前後不符嘅言論引起網民炮轟。