這天(29日)農曆七月初八，相信是好日子，除了馬會在沙田馬場拜神外，姚本輝、蘇保羅和苗禮德三位廐主，不約而同選擇這天舉行季前馬房拜神儀式。
其中苗禮德似乎最有號召力，雷神莫雷拉、史卓豐、田泰安、李寶利、黎海榮、梁家俊、蔣嘉琦、黃皓楠及巫顯東一共九位騎師撐場，似乎大家都睇中苗禮德馬房兵力強勁，希望分得一杯羮。而雷神更抱住女兒到場，搶去唔少風頭。開鑼日賽事苗禮德只出兩駒應戰，他表示史卓豐將為「龍城勇將」操刀，田泰安會就騎「豐彩皇」。
至於蘇保羅馬房拜神儀式，新任副練魯柏軒落力在旁打點，出席的騎師有潘頓及梁家俊等。蘇保羅透露新季頭兩次賽事出馬數目偏少，直至第三戰才會增加，而開鑼日唯一上陣馬「香江新星」已卜book由潘頓主轡，而這天拜神儀式潘頓帶埋年幼兒子Cash到場，Cash仔肥嘟嘟眼仔碌碌，個個都大讚佢好趣緻。
姚本輝就喺拜神儀式期間，指綠魔「有得威」過去三季初出得兩冠一季，利休後蓄銳一擊，從最近試閘走勢看，此駒狀態已很fit，開鑼日特首盃須負133重磅，所以搵重磅騎師潘頓執韁，不用負太多死鉛，希望牠有好表現，再按計劃遠征十月日本短途馬錦標。