因為凍齡而上咗英國《每日郵報》（Daily Mail）嘅新加坡攝影師Chuando Tan（陳宇飛），原來唔只50歲仲可以keep到咁靚仔咁大隻，佢最新更新IG嘅相，除咗騷白背心及強勁臂彎，仲有一條長長嘅物體，透露佢仲有一個長處。
大黃鴨之父設計抱抱象
呢個長處就係佢好有愛心嘞，相中Chuando抱住嗰隻鼻子長長嘅大象係叫抱抱象（Bubble Coat Elephant），造型可愛，用羽絨質料設計，其實係嚟過香港嘅大黃鴨之父──荷蘭概念藝術家霍夫曼Florentijn Hofman最新作品。Hofman同AllRightsReserved為深圳萬象天地搞藝術計劃，以抱抱象公仔為奧比斯籌款，幫助眼疾兒童重獲光明。
IG男神Chuando經常更新IG相，為45萬粉絲派糖大騷肌肉或賣萌樣，今次就幫手影呢張相，畀更多人知道呢個計劃。Model出身嘅Chuando，90年代出過唱碟，幫過舒淇、關之琳影相，亦曾為Janet Jackson嘅2008年大碟《Discipline》封面操刀。