敗選特首嘅前財爺曾俊華，生活多姿多采，唱歌開咪瓣瓣齊，仲瞓身推動慈善活動。近日薯片叔就喺佢facebook，貼咗一條同佢師弟森美食雪糕嘅短片。吓，兩個大男人食雪糕，有乜好睇？佢哋嘅食相唔似周秀娜，但娛樂性一樣誇啦啦，皆因佢哋係蒙住雙眼，互餵大家食雪糕，可想而知難度幾高，有啲雪糕仲沾咗喺薯片叔嘅鬍鬚，賣相同娜姐一樣咁吸引。
田少李小加祖堯BB接招
為乜要咁做？查實佢哋係為《導盲．Guide Dog》Ice-cream Challenge慈善活動獻身。接受挑戰嘅人，要揀一個朋友成為拍檔，兩人要蒙住眼，一隻手放身後、另一隻手則攞起甜筒，喺一分鐘內互相餵對方食完，過程中兩人唔可以接觸對方身體，完成後錄製視頻放上facebook，然後tag 3個朋友接力參與兼捐款。
其實呢個挑戰，旨在畀大家感受吓視障人士生活。薯片叔就話，香港有成18萬視障人士，但導盲犬則少過30隻，希望日後可以引進更多。至於佢點名接招嘅人，極具份量，除咗同佢一樣叫JT嘅自由黨榮譽主席田北俊，仲有港交所行政總裁李小加同埋中大校長沈祖堯，唔知呢3位猛男，會唔會應戰食雪糕？
李八方
