唔好以為做有錢人一定爽，其實各有各煩惱，好似香港兩個名門望族又鬧爭產，新地（016）郭家呢輪日日上報，之前鷹君（041）羅家咪一樣。自從早排三、四、五仔話終於見到阿媽後，戰況好似緩和咗啲。
噚日二仔、富豪（078）主席羅旭瑞話，只要媽咪心情好，想見邊位家人都可以，佢承認同「唔係支持媽咪」嘅兄弟比較少直接接觸，支持媽咪嘅兄弟就多啲傾講。
上次三兄弟同媽咪見面，羅旭瑞唔在場，以後亦無必要約齊人見面，「隨時媽咪話好，邊個都可以見」，希望班兄弟回心轉意，「若個個人都尊重老人家意見，孝孝順順，成個家族和洽，乜都有傾有講，一齊團結，一齊做生意，咁就最好」。
新地最近亦再掀爭產風波，羅旭瑞話羅老太「自己識睇報紙、新聞」。咁羅老太有無呻，話同郭老太感同身受？羅旭瑞話媽媽無特別提起，「外國、新加坡都有，大家族成日都有啲意見，無辦法。我希望家庭最緊要和洽，尊重老人家意見，好好哋，孝孝順順。」
佢仲話事情唔係冇彎轉，「於情，於法，於理都係合理嘅情形之下，個個接受呢個原則」，就可以解決喎。