汪明荃（阿姐）昨日70歲牛一，晚上假紅館舉行尾場個唱，前晚首場「汪明荃50週年The Timeless concert 2017」，以多個不同造型登場。當阿姐唱出其主演的經典劇主題曲《用愛將心偷》、《京華春夢》、《圓月彎刀》後，想當年自己都是政治下的受害者，感嘆說：「以前想去台灣發展，但因為冇參與工會，所以冇得去，𠵱家返內地做嘢都要睇背景，藝人好多時都係身不由己，希望以後永遠都唔好有呢啲政治問題影響。」
「本來諗住退休」
阿姐開騷並沒有請嘉賓，只由老公羅家英做司儀，兩人在台上打情罵俏，家英哥讚阿姐人靚聲甜，外剛內柔心地好，全世界得她一個做到。阿姐就讚老公有才華。但講到在屋企的重要性排序，阿姐笑言揀寵物行先，再到傭人、自己，家英哥排第四。
當阿姐唱完《自由女神》後，家英哥再上台說：「佢係我嘅女神，神神哋呀！有時你諗唔到嘅嘢，佢都會將佢擺上頭上面，嗰吓喺佢心入面，神來之筆嘅嘢。」之後，阿姐出場勁歌熱舞唱《熱咖啡》時，到觀眾席握手及收花，她說：「本來諗住退休，但原來仲有咁多花收，都係唔退喇！」
「唔好覺得渺小」
尾聲時阿姐唱完《華麗轉身》，依依不捨說：「由上海移民嚟香港，呢個地方畀咗我好多機會，香港人對我嘅愛、對我嘅包容，我知道我啲歌好多人話汪明荃style，但我係一個好努力嘅人，希望大家都係一樣，千祈唔好覺得自己太渺小，會盡晒全力去做。」
採訪：馬建華
攝影：沈健程