上周四菁英會喺會展搞10周年就職禮晚宴，請咗張敬軒同泳兒登場獻唱，但佢哋首歌在場人士冇乜聽過，皆因呢首係菁英會新鮮出爐會歌《帶著夢飛翔》，曲詞都由會中人包辦，作曲係副秘書長李煥明，作詞人有兩位，國語版由榮譽主席洪為民操刀，廣東版出自現屆主席莊家彬手筆。
八方問過洪為民，佢話個會想有會歌好耐，趁10歲生日的起心肝，搵英皇幫忙，一拍即合。佢個人用咗4、5個鐘填詞，因為一向有寫詩，對於押韻腳唔太難，而呢首並非佢處男作，之前幫譚偉豪填過競選歌，亦幫一套慈善電影插曲填詞，當然冇乜點plug過。
軒仔同泳兒早前仲同佢哋一齊錄音，據聞個超靚studio都有好多天王級歌手錄過音，軒仔仲同在場一班「學界菁英」學生分享咗香港歌手如今面對嘅困境。