年輕騎師史卓豐今朝（28日）進入高伯新馬房，打量「快利」一番後，便親自策騎此駒往機坪熱身，跟住人馬再到泥地大跑道出試，快踱一圈進行操練。
其時雨勢甚大，風勢亦非常強勁，部份馬匹縮沙暫緩操練，但全身濕透榨得出一大盤水的史卓豐，仍堅持往大跑道，為「快利」完成操練，可見備戰不容有失，希望此駒能在開鑼前保持進度，谷起狀態。而操練前後練馬師高伯新亦在旁打點，擺明此駒係季初重要爭分棋子。
唞暑後史卓豐已親試「快利」多課，當寶般摸到實，人馬上季合作3次得1冠1亞，非常合拍。「快利」本月才剛轉4歲，仍有大量進步空間。而高伯新以有限兵源，上季攞咗20場頭馬算有交代，現時養馬數目只36駒，形勢一般，必須早交出戰績以穩定軍心，所以「快利」更不會保留。