汪明荃（阿姐）為慶祝今日踏入70歲兼入行50年，假紅館舉行兩場「汪明荃50週年The Timeless concert 2017」，於昨晚開鑼，雖然昨早高掛8號風球，但下午颱風帕卡都被阿姐的霸氣逼走，首場個唱最終可以如期舉行。
家英分享
阿姐個唱於晚上8時35分開場，由劉德華以聲音做旁述介紹，指阿姐是一顆星匯聚着一個世紀，一個璀璨的名字。阿姐穿上白色喱士裝、配以鑽石鏈出場，獻唱經典作《萬水千山總是情》。阿姐落台換衫時，羅家英穿西裝出場，他先感謝大家支持阿姐，再食timeless的gag說：「因為timeless即係時間好短咁解，不過大家定啲，𠵱家係2017羅家英long long talk分享會，要分享人生中最重要寶物。」
羅家英開始介紹阿姐背景，他說：「汪小妹1947年喺8月28日上海崇明出世，因為個島有『明』字，當地有種好香嘅草叫『荃草』，所以個名就叫明荃。好巧合，1947年8月27日就係羅先生出世嘅時候，估唔到只係相差一日，呢個只係香港身份證咁寫，事實上又唔係。汪小妹同屋企人由上海來港，父母出去打工，佢就照顧細佬，所以兩姊弟好好感情。」
自讚夠堅
之後，阿姐唱出連串國語金曲，再向觀眾打招呼：「大家好，可以再踏上紅館舞台好感觸。申請紅館檔期唔容易，對上一次已經係十年前。」說起昨日打風，她說：「真係嚇死人，好彩汪明荃都夠堅，打風都打唔甩。」
採訪：馬建華
攝影：沈健程