眨吓眼啲馬仔已放完悠長假期，新馬季將會喺星期日（9月3日）開鑼！《蘋果日報》今日隨報附送一張「2017/18年度馬季月曆卡」（圖），不但有齊每個月嘅跑馬日，跑日賽定係夜賽、跑沙田抑或跑馬地馬場等資訊，以及三T、四重彩等注數表，投注幾多匹馬，總注數一目了然，資料齊全，而且設計精美，一卡在手，全季通行！
星期日就開鑼，《蘋果》馬經版每日有專題分析新馬季形勢，資料組從馬匹賽績、騎師必殺技同練馬師出擊手法等，以不同角度分析，同讀者一齊做定功課；上個馬季晨操專家積奇，獨家替本報讀者分析每場賽事形勢，經常捉到冷馬，今季積奇會再接再厲，身為馬迷嘅大家又點可以錯過？