天鴿襲港，威力驚人，掛十號風球，喺8月23日上午5時30分，當時左丁山仍在熟睡，未被風雨聲驚醒，七點半起身，見露台外無風無雨，心諗唔通「天鴿」只是虛驚一場，於是又上床瞓過。點知九點零鐘，聽到狂風打窗，嘭嘭聲，急忙起身睇吓露台落地玻璃門，哎吔，強風吹到玻璃震動，狂雨衝擊大窗，為之面青青，恐怕玻璃門一旦破裂，成個客廳飯廳唔使要咯。好彩，無法子唔讚吓新鴻基當年起樓，工藝十分妥當，全屋所有玻璃窗穩固唔漏水，能抵抗十號東北烈風正面吹襲，再次避過一劫。不過仍然氣頂，因為大客廳一角，竟有水自天花滴下，天花出現小裂痕，根據經驗知道，一定係樓上客廳積水滲下，幾年前有十號風球，已向管理處投訴，管理員拍門，無人應，後來知道業主長期不在港居住，卒之搵到業主親屬去開門，先至發覺樓上客廳近露台窗口打開咗，大量雨水積累在客廳一角向下滲落，令左丁山家居遭殃。今次又係咁樣，當然又向管理處投訴，管理員循例到樓上㩒鐘拍門又係久久無人應門，向左丁山表示無可奈何，有如此樓上absentee landlord，都唔知佢返咗加拿大還是澳紐享福，有乜佢符？唯有嘆聲倒霉，如果有機會見到佢，真係想同嗰位業主講：「不如你賣咗個單位俾我！」
終日閂晒所有窗，冇法子唔全日24小時開冷氣，唔顧得要交幾多電費咯，相信人同此心，心同此理，全港民居用電量大升，中電港燈在十號風球之日，可能暗暗地偷笑（至於可否抵償商業用電量之下降，我哋唔知），但即使兩電公開大笑，亦係值得稱讚嘅，澳門打風，幾乎全個澳門停電半小時，連賭場都冇冷氣，皆因向珠海買電之過！不久前，台灣溫度特高，全台灣停電，每次見到海外打風，必有停電新聞，五年前美國有颶風吹襲紐約市，曼克頓停電差不多一個星期。當時美國電視台曾經做一個專輯分析香港點解打風唔停電，假如美國記者訪問左丁山，都識講香港發電量充足，電網穩固，平時維修有水平，所以極少發生所謂大面積停電事件，幾十年來無論吹甚麼風球，都未見過有如台電澳電跪低嘅事件，此乃香港之福，亦係香港重要經濟競爭力之一，任何可以影響香港供電穩定嘅甚麼政策建議，香港都唔應該採納。加電費比較起來，只係小事，供電穩定性及不停電，才是重中之重，相信黃錦星局長平時唔開冷氣，在8月23日亦會破例，佢冷靜之下，或會感恩香港冇停電，否則佢會狼狽過崔世安好多！