自爆着襪小秘密嘅林兆波，噚日出動去咗個數學講座做主持，咁佢個鍾意着黑絲嘅太太、即係特首林鄭月娥，又去咗邊？原來又飛咗，今次林鄭係去天津出席第十三屆全國運動會開幕儀式，而佢噚日特別到咗選手村，為香港運動員打氣，祝港隊旗開得勝。
教練趁機表訴求
林鄭期間同過劍擊代表歐倩瑩、林衍蕙同張家朗交流，林鄭話知道劍擊運動已經進入校園，希望佢哋繼續努力，仲鼓勵體育界多向政府提意見。
林鄭同時亦同香港男子手球隊見面，話輸贏非最重要，最重要係體育精神，手球隊教練就把握機會，當面向林鄭提出希望增加室內練習場地。
林鄭仲強調，政府會鼓勵同支持退役運動員就業或繼續進修，又話啟德體育園區除咗硬件投入，人才培訓都好重要。林鄭今朝觀看完男子武術長拳比賽後，下午返港。