工廈劏房大火、公屋輪候人數破紀錄……居住問題困擾香港人。「劏房唔係攞綜援先住，一早已係大眾問題」。長年住劏房的90後港大畢業生任真，早前就與拍檔李風清，推出「好宅」平台助人自助，權充另類中介，除了替租客在網上張貼「搵房告示」，又主動出擊代尋良心業主，以協助維修及管理租務為誘因，鼓勵業主以市值8折租金出租唐樓單位，並把三份一租金納入維修基金，由民間發起「住好啲」，實行「自己劏房自己救」。
記者 呂麗嬋
178cm的任真，高高瘦瘦長髮披肩好易認，街坊都叫她高妹。這天，艷陽高掛，氣溫32度，記者跟着她徒步走上唐七樓，與業主王先生及裝修師傅新哥，齊齊商量裝修大計。「三房分租俾三戶，喺廚房加多個廁所，方便好多」、「個廳好大，可以劃個位俾租客放吓雜物都唔錯」。3個人，指手劃腳的在比度，沒一陣，人人滿頭大汗。50年代落成的9層高單幢唐樓，位於九龍城啟德道，夾在新落成豪宅中間，樓下都是車房。
「你有層舊樓，梗係有人遊說你變做劏房收多啲租，不過我唔想，覺得好危險，層樓燒咗仲有個殼，人死咗救唔番，你睇之前發生過幾多單？有咩事一世唔安樂，寧願分租俾幾個家庭，收少啲租唔緊要，企理準時交租就得」。不願上鏡的業主王先生，原本在獅子石道開時裝店，退休後與妻兒搬到將軍澳新樓，騰空的三房唐樓，一直想平租給有需要的人，知道任真發起「好宅」計劃，可助配對租客和處理租務問題，雙方一拍即合。
港府正推出「共住共生」過渡性住屋項目，透過社聯承接市建局在旺角豉油街14個閒置單位，租給有需要的人。其實，在「窮則變」的民間，早有如「好宅」一類由民間發起的小型計劃試尋出路。「都係邊試邊做，有啲業主好似王先生咁，希望搵俾幾個租客共住，唔改間格；有啲本身已經劏咗做幾間，日久失修」。基層住屋問題多如牛毛，由平等租約到濫收水電，身受其苦的任真，在大學期間，就試過聯同不同壓力團體，爭取保障權益。
「請願、向政府遞交意見信，但只要一提出租務管制，政府嘅回覆都係：不能損害業主利益」。與其「等救」，不如主動出擊。去年她與拍檔申請社創基金，結果獲批10萬資助，用以開展「好宅」計劃。小妮子強調不是要業主蝕底，「我哋可以代介紹有信譽嘅租客，代處理租務問題，希望做到雙贏」。摸着石頭過河，她認為行出第一步，就有機會。「多數業主其實唔介意收8成租，亦認同依家樓價好癲，根本唔合理，不過一講到維修（後放租），佢哋好多都好擔心要攞好大嚿錢出嚟，呢個係最大嘅難題」。
出身基層家庭，現年24歲的任真，自嘲是現代遊牧民族，居無定所。「觀塘未重建時，同一幢舊樓，由樓上搬到樓下，試過老師問我係咪寫錯地址」。中學搬過4、5次，沒訂正式租約，被狂加租迫遷，是常態。「最短住上幾個月就要走」。幫人覓好宅，自己卻是苦主，不無諷刺。「水費收定額$100，電費正常每度電$1.1，業主就收我$1.4，但你唔租大把人租，後來先知有劏房戶打上電台，有業主甚至收到$3、$4一度電，租客都是敢怒不怒言」。面對赤裸裸的不公，她想改變。
去年港大翻譯系畢業，家人都希望她做回本行的工作，要不就投考海關及入境處等紀律部隊工作，鐵飯碗有保障。「其實都係現實考慮，但我覺得，做自己鍾意嘅嘢好緊要」。由政策倡議到做社企中介，配對良心業主給基層租客，她說至今已與兩個業主簽訂租約，並正跟進處理包括業主王先生在內，另外8個分別位於太子、深水埗、土瓜灣及九龍城的唐樓單位。「都係過渡性計劃，想試吓係咪可行，但長遠嚟講，政府應制定政策，唔好推個波俾業主同社會機構」。她說。