富豪K話父母培育仔女，最重要階段係在6歲之前，在幼嬰兒成長為幼童嘅階段，因為雖然我地表面睇唔到，但一個人之腦神經發育發展，在6歲前已大致完成，即是說「先天性自然發展」告一段落，6歲之後就靠後天培訓了。
富豪K並非空口講白話，而係搵過專家研究過，自己以腦科醫生訓練基本功（因佢三十幾年來已棄醫從商）去判斷嘅。從實質層面睇，一個幼童如果得到母親（父親通常比較粗疏）嘅tender loving care，晚上抱住幼童（或幼童在媽咪懷抱裏）講童話故事，聽完，問完先至睡覺，幼童會有極大安全感滿足感，對語言及文字自自然然產生興趣，不會排斥，會一路喜愛讀書，唔怕學習文字。富豪K話：「最弊不少人有菲傭、印傭，一切湊仔女功夫，交晒俾外傭打理，阿媽工作太忙，夜夜唔返屋企，或者晚上愛開ball，唔返屋企睇住仔女上床睡覺者，更弊！」咦，再講落去，就會政治不正確嘅嘞，商業世界講究diversity，要提升女士做高管及CEO嘅比例，女士們如掛住返屋企湊仔女，在公司升唔到級，就會被人批評係「歧視女性」！
富豪K笑曰：「我夠膽私底下講，女士對世界之最大貢獻就係在家培育下一代，未來世界領袖、科學家、藝術音樂家都係靠肯犧牲自己6年寶貴時光嘅偉大女性培養出來嘅。不過於公開場合，我一定講求政治正確，以免俾人鬧！」
上星期在now電視嘅Fox Movie睇咗一套B級片（now通常冇乜好戲睇嘅），男主角話想太太生BB，女配角對佢講：「生咗一個之後，要由餵奶開始，跟足BB六七年，即係犧牲自己career，你要求老婆太多嘞！」這大概是發展地區女士嘅流行想法，所以歐洲日本生育率偏低，香港亦然，卒之搞到人口老化，年青工人不足，退休保障制度受威脅。富豪K談到幼兒要聽莫扎特，左丁山不懂音樂，問多幾句，富豪K話佢彈咗多年莫扎特、巴哈樂曲，覺得巴哈比較硬一啲，而莫扎特除咗溫柔舒暢之外，音色與樂器之運用，有對稱美，佢暗中配合數學上之運算法則，按莫扎特之人生背景，似乎不應懂得數學，但音樂就有類似數學概念嘅運用，真天才也。幼兒多聽莫扎特，對腦筋發展會有良好影響。與富豪K食午飯，餐飯就好普通嘞，但聽佢講說話，仲enjoy過去Bo Innovation食晏！