影帝梁家輝昨日跟太太江嘉年及女兒梁穎晨（Chloe）在北角出席車房CarBros開幕，車房其中一名股東是梁家輝世姪，所以邀得梁家輝獻出處男剪綵，Chloe則穿着露肩裝晒香肩示人。梁家輝笑言：「冇乜嘢送，下星期拎架車嚟整，創業同守業都好辛苦，唔好學好食懶飛。」
支持Chloe入行
梁家輝表示平時甚少出席剪綵，這次更是第一次，他專程來支持世姪：「佢哋好值得鼓勵，希望香港年輕人唔好自怨自艾，其實好多機會。」問到他是否收友情價？梁家輝說：「我哋唔講錢，唔好吓吓講錢啦。」他謂從沒想過創業：「我創造咗事業同家庭已好叻，喺自己專業上賺取生活費，冇人叫我做生意，好耐之前已知唔係做生意嘅人，唔好見人炒金、炒樓又去。」
有傳現年25歲的Chloe會加入娛樂圈？梁家輝否認，問到可覺得女兒有潛質？他說：「要畀多啲機會試吓先知，唔係話想入行就幫佢，呢啲路要自己行。」梁家輝指女兒做任何事都不會反對：「就算佢𠵱家話結婚生仔都唔會反對，呢個係佢嘅路，佢係成年人，喺社會做過事。」可心急嫁女？他說：「唔係話為結婚而結婚，最緊要搵到一個可以負託終身嘅人。」梁家輝覺得嫁女不會感到不捨：「佢結婚啫，好多人誤會個女嫁咗，個仔結婚就冇咗，對家庭信任，唔會嫁咗個女就冇咗個女，反而多咗個仔，老實講佢一世唔嫁跟住我，我仲心噏，組織幸福家庭戥佢哋開心。」
拍麥浚龍新片
此外，梁家輝正趕拍麥浚龍執導電影《風林山火》，要到深圳和馬來西亞拍外景，預計拍到10月，有指他戲中要爛臉？梁家輝說：「唔透露得，可以講嘅係其他人會俾我打死晒，所以留守到最後。」
採訪：羅慧敏
攝影：沈健程