姜皓文（黑仔）喺今年憑《樹大招風》獲得金像獎「最佳男配角」提名，而喺頒獎嘉賓春夏嘅介紹中，仲講到黑仔兩年來拍咗26部電影，而佢最後飲恨係輸咗畀曾志偉，而志偉獲獎時仲講「黑仔，俾心機，我一部撼你26部，跟住就係你喇，知唔知啊？」不過就因為呢句「一部撼你26部」搞到滿城風雨，有網民就指曾志偉係寸緊黑仔咁多套都攞唔到獎，而同樣都有網民就話呢個係志偉鼓勵緊黑仔。
點都好，其實黑仔咁多作品入面有好多精采作品，除咗喺《樹大招風》飾演嘅賊爸爸大輝之外，仲有佢喺《五個小孩的校長》飾演其中一位學生嘉嘉嘅父親盧強，角色講到佢因為意外導致傷殘，最後仲實現夢想做賽跑選手，而黑仔嘅演技亦非常摧淚。此外，黑仔亦曾經喺《激戰》入面扮演賤輝（張家輝）嘅好友太歲，而佢喺戲中知道賤輝要參賽打MMA時，想去勸老友，而賤輝亦爆出段段金句，例如「我唔想熄燈嗰陣，一件值得記得嘅事都冇呀！」、「我仲有嘢輸咩？唔緊要啦，贏又好、輸又好，啲嘢都返唔到嚟！」當中黑仔嘅演繹亦都非常出色。