「美少女轉身變，已變成戰士……」吖，唔係，原唱動畫《美少女戰士》主題曲嘅周慧敏(Vivian)、王馨平(Linda)、湯寶如(湯記)，即係當年寶麗金嘅其中三朵小花，已經唔做戰士，全部榮升做晒靚靚人妻喇！前晚佢哋仲同昔日寶麗金嘅陳曉東，一齊去咗電視城，錄影《流行經典50年》。
上月，王馨平已經去過大台錄影《流行經典50年》，當時佢就唱咗亞視經典劇集《我和殭屍有個約會》嘅主題曲《夢裡是誰》，之後仲同主持之一嘅湯寶如合唱《美少女戰士》，當時已經好多網民話今次三缺一，冇咗周慧敏，實在有啲可惜。
前晚呢三位美少女戰士周慧敏、王馨平同湯寶如，終於合體，但係佢哋並唔係合唱《美少女戰士》，而係周慧敏嘅另一首經典歌《自作多情》，問到佢哋三個難得合體，都唔唱《美少女戰士》，咁咪會令到好多人失望囉？周慧敏就講到上次同湯記同Linda合唱時，都好興奮，但講到要佢哋再合唱《美少女戰士》，周慧敏就話一定要搵一個好特別嘅方式，要俾啲時間佢哋構思。