有30幾年歷史嘅觀塘裕民坊老麥，陪住唔少香港人長大，有時八方收咗工都會去嗰度醫肚，但估唔到，青年民建聯主席顏汶羽都喺嗰度留低唔少腳毛。
為咗紀念呢間老麥，顏汶羽噚日同埋幾位區議員一齊去老麥食咗餐，順便緬懷昔日嘅好時光。佢話自己4歲嘅時候經已喺呢間老麥食魚柳包走醬，到小學就食兒童餐，中學就直頭同同學坐的士去買外賣。
大家都知，以前老麥成日會出啲小玩具吸引小朋友拉阿爸阿媽去幫襯。顏汶羽似乎亦儲落唔少呢啲小玩具，睇佢同黨友柯創盛放到成枱都係就知喇，當中有幾款八方都擁有過。點樣緬懷都好，始終改變唔到呢間老麥，將會同好多其他香港嘅集體回憶一樣，即將成為過去。