反新界東北13名社運人士及雙學三子被重判入獄，引發國際社會強烈關注同支持，上周日都有以萬計市民上街撐佢哋，而民主派對佢哋嘅聲援行動未結束。人民力量正副主席陳志全（慢必）、譚得志同10幾人噚日喺中環街頭穿上「囚衣」、戴上手銬，呼籲市民聲援在囚嘅雙學三子同反新界東北16名政治犯。
慢必話雙學三子被港府覆核刑期入獄，雖然上周日有逾10萬人遊行聲援佢哋，但律政司司袁國強好似冇理民意，日前撰文都冇解釋為乜佢冇理律政司入面嘅反對聲音，獨排眾議要覆核三子刑期。慢必鬧袁國強，咪以為就咁寫堆字出嚟就當解釋咗，佢話人力會繼續支持在囚，除咗佢下周三會以議員身份到監獄進行公務探訪外，人力亦會喺街頭收集市民簽名，製成心意卡送畀16名在囚政治犯。