大編輯自中文大學取得比較歷史碩士學位後，成為中大校友，憑此身份可以申領中大圖書館證，於是每逢有空就揸車返中大到圖書館讀書，享受寧靜，亦一樂也。
點知前星期某日，大編輯埋首看書之際，突然有人向圖書館管理員投訴：「乜電腦上載得咁慢㗎？」管理員答：「或者因為更新系統用Window10，系統要適應，所以慢咗一啲。」幾分鐘後，此人又大聲問：「仲未得嘅，部電腦係唔係壞咗？」管理員答：「冇壞呀，或者等多一陣啦！」此人即刻破口大罵：「你係乜態度呀，識得出糧，唔識做嘢，我地納稅人養你㗎，就係你地呢啲人，令香港沉淪！」管理員呆咗一呆，好似怕咗佢咁，立即講：「Sorry，係我唔啱，我老套無知，請原諒。」大編輯見周圍讀書人，個個沉默不語，當冇事情發生，氣往上湧，企起身想話走埋去趕嗰位仁兄走，但管理員打手勢叫佢唔好，講多幾句低聲下氣說話，個惡人悻悻然而去。大編輯話：「中大太過好人，嗰條友直情係可惡刁民，如果有圖書證，應該取消佢張證，以後唔俾佢入圖書館啦。」哦，可能有人患上躁狂症呢，今時今日，在公司被上司鬧，返屋企俾老婆話兩句，出到外面碰上不如意之事，咪搵人出氣囉。香港人慣咗自掃門前雪，極少見義勇為，挺身而出為弱者出聲嘅。
呢日食飯時碰到富豪K，同佢閒談幾句，因相識30幾年，夠膽問佢除咗搵錢之外，如何回饋社會。富豪K話：「我地低調得很，做咗冇乜人知，其實我家族有慈善基金，每年幫助不少深水埗貧童學習音樂，學習樂器，受惠者有過千名兒童，我地又斥資請兩位教授研究如何培育兒童，發現中國古老說話有一句『三歲定八十』，幾有道理，循此研究兒童腦部神經、腦部肌肉及內裏神經線之連接，過程發現兒童腦部發育，由零歲至六歲不斷發展，擴展至六歲後已大致完成，一個人嘅性格、性情、智能已經開始定型。所以我嘅新說法係六歲定八十，六歲前嘅教育極度重要，緊要過大學好多，我認為政府應該大力扶助、津貼學前教育，幫助貧窮家庭兒童！」哦，上述那位在中大圖書館鬧事之人，唔通頭腦就係在幼童教育時期已受影響？不過呢類人唔值得理會啦，我地教孫應該點教先？富豪K話：「你聽我講就做兩樣嘢，第一，叫新抱抱住孫仔孫女晚晚講故事，第二，家中多播莫扎特音樂，對幼童有神奇效果。」富豪K本來係腦科醫生，自幼至今彈琴幾十年，唔信佢就蝕底咯！