政府每逢九月就展開新一輪政務主任（AO）招聘，公務員事務局局長羅智光噚日同參加政務職系暑期實習計劃嘅大學生見面，鼓勵佢哋加入政務職系。羅智光為官30幾年，佢同大學生會面時特別分享當年決定成為AO嘅心路歷程。
透露今年目標請40多名
佢話自己喺海外讀大學時已開始思考前路，諗過究竟到第三世界工作定喺音樂方面發展。翻查資料，原來佢擁有英國皇家音樂學院八級鋼琴、管風琴、中提琴及通識音樂資歷，2014年仲喺文化中心舉行嘅管風琴音樂會上演出，音樂造詣真係有番咁上下。不過佢左揀右揀，最後都係投身AO行列，原因係佢當時認識咗一班年輕AO，覺得佢哋有智慧有理想，深受吸引；而且AO每幾年調派唔同崗位，畀佢多方面嘗試，所以最後選擇返加入政府。AO起薪點高達4.9萬元，每年招聘都爭崩頭，佢透露政府今年目標係聘請40幾名AO，有興趣人士記住留意政府9月出ad啦。