曾協助華人首富李嘉誠及船王包玉剛，成功併購英資財團嘅匯豐前主席沈弼（Michael Sandberg），上月初90高齡辭世，喺英國漢普郡嘅教堂，以家庭形式低調舉行喪禮。噚日《南華早報》報導，由沈弼兒子小米高．沈弼籌辦嘅追悼會，將於下月6日在香港會所舉行。
上月底英國國家檔案館新一批解封檔案資料顯示，回歸前沈弼曾致函時為保守黨國會議員Julian Amery，請求對方協助與其素有交情嘅本港富豪李嘉誠，取得英國公民資格。
對於在港追悼，小米高．沈弼話父親嘅喪禮已在英國舉行，「只希望在港籌辦一場追思會，讓不能出席喪禮的朋友及沈弼生前同事，向父親作最後致敬」。佢又補充沈弼熱愛香港，喺本地結交大量華洋朋友，這些友情在他父親退休後仍延續不息，沈弼亦一直視佢嘅同事同客戶為同行夥伴，「大家以團隊精神，締造了香港經濟及營商的成功故事」。