市民遊行曬死，林鄭卻在fb曬命，與高官酸齋燒味。po那張飯敍照片是叫你入定，反思：
一，白枱布上的食物，每盤前面都有小字牌，寫住燒腩仔、蜜汁叉燒、燒鵝……。告訴市民，高官不是不食人間煙火的妖怪，日後民×聯與西環合搞蛇齋餅糭，一樣奉陪，不會避嫌。甚至，會等埋楊官。
二，既然等埋楊官，成枱燒味，自自然然諗起林鄭剛剛為新界大地主扶靈冇耐。反東北發展班年輕人坐晒監，官商鄉黑，飲得杯落。網民說叉燒燒腩呢類拜山指定mode襯晒成班白衣、白紙碟和白膠叉的高官。網民創意問，emoji幾時出三鞠躬符號？
三，集思會高調食燒味，可見林鄭對平均年齡59歲的問責團隊很放心，知道就算硬啃成枱三高食物，都唔會有問責班子扣喉。擦燒味，有擔當，跟飲鉛水一樣，有礙健康，這叫做與民共患難lol。
四，通通都係肉，零青菜！林鄭暴露團隊的食肉屬性，叫橫洲和東北鄉民死咗條心佢！兩碟酸齋又代表乜？撐袁國強重判傘運參與者，齋口唔齋心，叫佢哋求仁得仁！噢，放心吧，慈母又點會打袁齋，唔要和尚呢。