星期日早上在家hea咗一朝，腦筋未醒之際，突然電話響起，係老校友Y來電：「喂，做乜TVB抽起頭條新聞之後，依家連城市論壇都冇埋，係唔係香港電台已經受政府禁制，不准再有城市論壇？」一時之間，以為北京壓力，排山倒海而至，19大開會之前絕對維穩，連香港都唔准有噪音？定一定神，望到個月曆，不禁啞然失笑，回答校友Y：「哎吔，唔使咁驚，每年8月，天氣太熱，城市論壇會唞暑暫停，九月就會有番嘅嘞，你唔駛咁杯弓蛇影！」校友Y話：「希望南華早報任美貞專欄與城市論壇真係可以放完假就再出現啦，一國兩制似乎急速向一國傾斜，兩制不知何日名存實亡，范婦人叫我地呢類人可以離開香港，我真係開始有此意思，無謂成日聽到范徐、譚惠珠、梁愛詩呢三位老婦人嘅聲音！」
吓，校友Y都係老婦人喎，年齡同譚惠珠差不多，點解對政治嘅想法相差咁遠呀，正如法官之不同，各如其面焉！楊振權法官對示威嘅睇法，與原審法官完全不同；楊官參加一批反佔中法律界人士嘅聖誕酒會聯歡聯誼，其行為亦與楊鐵樑大法官謝絕應酬之情況唔同！李國能大法官係熱愛賽馬之人，曾是馬會董事，但做咗終審庭首席大法官之後，絕少到馬場見老友，要直至退休之後，先至恢復養馬，為甚麼如此？要避嫌也。陶傑觀察力特強，指香港特區華人法官嘅思想要改造，需時甚久，第一步要拿下香港大學文學院，確係高見。但左丁山老友律師W來電：「中學尖子已好少報考英國文學及中國文學，邊會入港大文學院吖，唔駛拿下嘅嘞，港大文學院還有幾多人讀歷史，你估係李柱銘、吳靄儀讀文學院時代？你問吓就知。文科尖子多數係讀港大法學院，例如袁國強、楊振權、湯家驊，所以假如我係陶傑，就會話，要奪回港大法學院，由律政司起訴戴耀廷，判佢坐監，跟住由校委會出手，搵辦法趕走陳文敏、張達明等同路人，咁就有機會保證以後二十年，三十年，香港嘅法律界人士大部份有資格做人大政協，維護有香港特色嘅司法制度，那怕英帝美帝干擾嘞！」石永泰大律師認為法官判案不應受到批評，抵鬧嘅反而係戴耀廷，就係反映咗大公報文匯報日日傳播嘅訊息，讀多一千次，就會變成「真理」。法律界要維護法律權威，關乎法律界利益；搞政治嘅就識得利用委任，任命法官程序，達成法院為政治服務嘅目標，呢樣美國政客最識玩，香港掌權人偷師有何難！