日前到訪北京的英國外交部亞太事務國務大臣田銘祺（Mark Field），前晚抵港後，噚日即展開連串行程，朝早約咗一班香港年輕人食早餐後，就接受本港傳媒訪問，跟住就搵包括建制派周浩鼎、鍾國斌、謝偉俊在內嘅立會議員食晏，再去特首辦見林鄭，噚晚即離港去南韓同新加坡繼續外訪。田銘祺仲預告林鄭11月將到訪英國，即係佢老公「老家」（林鄭曾自爆老公當年透過居英權拎到英國護照），相信屆時會再同林鄭會面。
田銘祺又自爆，今次係第三次來港，第一次係1994年以遊客身份來港，第二次係2016年以國會議員身份來港，但用國務大臣身份來港就係第一次。
田銘祺又話，香港對佢來講唔陌生，因為唐人街就係佢喺英國嘅選區，佢仲話識講幾句廣東話，即場表演講咗句「恭喜發財」，令唔少傳媒都笑咗。