前幾日青嶼大塞車，唔夠5蚊銀找錢竟然都係原因之一，大家先驚覺香港電子支付有幾落後。不過，金管局高級助理總裁李達志（Howard）似乎唔係咁睇，今日正係金管局初次發出儲值支付工具（SVF）牌照一周年，回顧呢年以來，佢就話其實已經有唔少進步，仲遇到個好支持電子支付嘅的士司機。
李達志係《匯思》提到，以前同Friend講用手機P2P「夾錢」，就比人笑係多此一舉，有cash唔用要用電子錢包。不過宜家風水輪流轉，用現金反而被人笑。所以，佢相信電子支付發展以後會更快，甚至可能出現本地電子錢包可以衝出香港，跨境使用。
佢仲講到，上星期坐的士時，見到司機椅背有二維碼 QR Code，可以畀乘客用手機電子錢包畀錢。司機仲「充滿朝氣、興奮」咁同佢講，所屬車行半年前已經安裝信用卡讀卡機，遲吓仲會加裝其他電子收款的渠道。「他笑容可掬的面容透出絲絲驕傲，看得出他對可以提供新一代的士服務感到十分自豪……」睇黎呢程車Howard好滿意。