早排Twins嘅阿嬌爆咗金句「個個都拍拖，唔通個個都想拍拖咩！估唔到噚日喺長實地產（1113）股東會上，都出現異曲同工嘅對話。事關小股東非常關心「長實地產」改名做「長江實業集團」後有咩着數，副主席李澤鉅即刻又爆出金句：「改名就會賺多咗錢，啲公司咪日日改名？」
咁又係，間間公司都改名，唔通間間都好似長實咁賺錢咩！李澤鉅就直接話「唔會咁着數」，又更正股東「改名」的說法，形容今次係「名正言順，我地係『正名』。」
李澤鉅話，「對好多長情股東嚟講，包括我爸爸（主席李嘉誠），硬係覺得『長江實業』順耳啲呢！」難得現場一班老股東亦立即跟着起哄猛話「係」。李澤鉅接住就解釋，原來之前因為系內重組，礙於規例而要沿用舊名，今次係趁有新行業加入，才決心為集團正名，仲話「包括爸爸、成個董事局，大家攞番長江實業都好高興！」李澤鉅又指，今後長實依然係做實業，「地產係實業，樓宇內的基建都係實業。」