【本報訊】長實（1113）副主席兼董事總經理李澤鉅早前被副董事總經理葉德銓笑指「maybe chairman next year！（你明年可能是主席）」後，李澤鉅昨首次公開回應，「我未接到主席通知，我嘅責任就係副主席兼董事總經理，我只可咁答」。
李澤鉅指，「喺長江、長和系30幾年，同爸爸大家一路做嘢，不覺得工作上會有任何轉變，團隊好多同事係亦師亦友，這個問題不需要再答。」
市場憧憬「長實地產」改名為「長江實業集團」後或再重組，李澤鉅直言「唔再組啦」。問到會否繼續回購，表示「我守返自己職責，做完一定要講，未做前咩都不講得。」
強調長實長建無重叠
李澤鉅回應股東提問時，強調長實長建角色無重叠，「建築、地產係我哋本行，我哋不會離開」及「永遠繼續做」，又指「長實、長建係相輔相成，點會混淆」。
他指，自從主席李嘉誠表明在地產以外增加穩定收益業務後，已一直物色項目，目的係「唔好冒一啲唔需要冒的險」，目前股價已反映一切，已「行啱路喇」。像加拿大Reliance Home項目屬於樓宇內項目，與長實現有職能接近，且比長建更熟悉，而做大型收購時兩間公司可互補、分擔風險、起協同效應，同時避免於競價前作公開披露。
他又否認長實是轉路向，指地產有周期，分散業務就不用逼於「邊個時期一定要買地，一定要賣地」。葉德銓表示目前地產仍佔七成以上總資產。李澤鉅指，「不理前路、後路、回頭路」，只要「為股東搵到錢的就是好路」，「加拿大項目我覺得好好，中長期有（稅後）雙位數回報」，又指項目優質，「缺點睇唔到，睇到缺點就唔做啦！」
長實昨日改名及收購的議案，均獲股東大比數通過。