「你就算charge我幾百萬，我還唔到畀你咁有咩分別箒？好似郭伯伯咁講（長洲覆核王郭卓堅），破產咪破產囉冇所謂㗎！」終審法院今日處理青年新政游蕙禎及梁頌恆就宣誓案嘅上訴許可，若被駁回或再敗訴，兩人隨時背負至少1,200萬堂費及立會追數等債務。佢直言生活其實一直如常，「我本來就只係一個普通人，就算我仲係立法會議員都係普通人」。
無悔參選、無懼破產，面對明年初立會非法集結案開審，游蕙禎坦言已有入獄嘅心理準備，較為在意嘅反而係秀髮，笑言要先行剪短以免畀懲教人員剪壞。
回顧DQ前後，佢只係養成買餸煮飯嘅慳家習慣，「買到街巿啲人都認得我」。曝光率減少，「買要見人嘅衫都少咗，你見我以前成日都係着嗰幾件，因為我真係得呢幾件」，佢平時有必要先出門，「我不嬲都係一個宅女」。
稱愛情非必要
佢已有穩定工作，但「唔想講太多費事麻煩到人，𠵱家維持到生計。DQ到𠵱家其實我只係問屋企人借過兩次錢，都係解燃眉之急」，家人問及原因後馬上幫忙，卻令佢愧疚，「唔想又要連累屋企人」。
前路仲可以點走？「我會諗點樣用自己嘅網絡去講自己嘅嘢，DQ一役反而朋友多咗。」街上亦遇過巿民打氣。佢強調從未放棄青政工作，亦希望嘗試重拾地區工作，「有好多人分分鐘比我哋付出更多，企喺比自己更困難嘅位置」。
佢未為被DQ流淚，但最難受係上星期眼見眾人因幾年前案件被判加刑入獄，「我喺集會係差啲忍唔住喊，見到朝住同一個目標嘅人相繼入獄」。
作為26歲單身女性，佢話父母遲婚，又叮囑要有足夠經濟條件先結婚，現階段唔覺得愛情係必要，「我目標係想讀多啲書……我又唔係要趕尾班車，同埋我邊係一個人箒，我有兩隻貓㗎嘛」。
李八方
