時尚產業風光背後，有一大群人默默付出，馬天佑與Ricky Sham便是本地其中兩位紅星造型師。身兼幕前工作的馬天佑將製作公司發展至20人架構，自己主力監督造型與拍攝；Sham則樂於落手落腳，以3人小規模公司，承接郭富城個唱歌衫、舒淇康城戰衣大製作。
採訪：林嘉慈
攝影：林德雄
馬天佑與范冰冰
馬天佑在2011年為吳雨霏打造《我本人》唱片封套，開公司經營形象設計，「開波有4個人，兩個係stylist。」六年來，連帶廣告策劃，增至約20名員工，屬行內少有具規模的公司，「模式同出面唔一樣，有五個唔同嘅stylist，我淨係負責畀方向，真正搵衫、接觸artist、去拍攝現場係佢哋，我角色係判定佢哋諗嘅啱唔啱，中唔中artist同個job嘅brief。」
實習改變一生
現時能影響時尚界，但原來馬天佑曾經完全不喜歡時裝，「讀書差，入唔到好學校，心諗大鑊喇，唔可以喺度四年，一定要去倫敦讀書。」同學叫他去試考毋須通過英國大學聯招UCAS的London College of Fashion，「真係去咗見個dean，同佢講I love fashion，但嗰陣冇fashion background，亦完全唔鍾意fashion。」
完成第一年課程，對時裝還是沒感覺，直至翌年留班，馬天佑說：「超大打擊，要我重讀最後兩個月，即係有十個月唔知做乜，人生唯一一次有迷失感覺。」幸好自薦去英皇娛樂實習被取錄，真空期沒白過，斟茶遞水、聽demo揀歌、幫手去頒獎禮執頭執尾等七個月的經驗，改變他一生，「同自己講要對讀嘅嘢有passion，先開始鍾意fashion。」每逢暑假他都趁機打工，輾轉在東亞唱片及台灣金牌大風實習過。
四箱行李赴京
談到合作以來最難忘，馬天佑透露是2013年與范冰冰合作，「有機會影范冰冰、李治廷，心情好澎湃，瞓唔着，好似得五日準備，send咗100個email去世界各地嘅牌子，搵咗一堆好特別嘅items返嚟。」攜四個行李箱去北京，到場才發現二人當日要連環拍攝，不能再換化妝髮型，又要在白佈景下拍照。
馬天佑說：「喺最灰心之際，范冰冰拎起件衫話幾得意，問喺邊嚟，我就解釋係exhibition，為拍攝而拎嚟。佢就話影呢啲衫，你應該唔係想就咁影，我即刻精神晒！」最終她換了妝拍了四小時，而驚喜在於被她問電話號碼，兩個星期後收到她電話，「佢話最近拍戲有乜造型，我問『你是范冰冰？』oh my god！嗰下感覺有啲頭暈，就做咗好幾個好玩嘅project。」
更多精采時尚內容，盡在 http://add.appledaily.com 。