樓價幾時跌？好多人都想知。發展商推優惠減價速銷新盤會係其中一個先兆，不過唔係必然。當新盤開價相對回落一至兩成嘅時候，就係關鍵所在。唔少人見到減價或疑似平價都會秉持住「執輸行頭慘過敗家」呢個信念盲衝，不過筆者在此呼籲衝之前，請停一停，諗一諗。
海之戀一期賣樓情況萬人空巷，迅速沽清。長實地產（1113）諗住食住個勢上，火速推第二期，仲要賣貴7%，點知就觸礁。同樣情況仲有63 Pokfulam，銷情慘淡，首批50伙，賣得13伙，僅沽26%。有見及此，華懋荃灣西全．城滙即以「筍價」速銷試水溫，而一班等上車客見平過海之戀．愛炫美首批14%，仲唔衝咩？
果然，減價所釋放嘅購買力非常強勁，全城衝呀！全．城滙已打低海之戀及去年元朗Grand Yoho，成為自97後新盤票王，累積收票近2萬票，較周五可供發售單位超額認購逾37倍。華懋之後加推202伙即加價8.4%，變相向其他發展商大派定心丸。
樓價難跌係事實，因為仲有一大班驚蝕底嘅人等執平貨，但又係咪代表樓價可以再創新高，衝多一兩成？難矣。好多人會安慰自己，「2016年3月樓價都跌超過一成啦，之後咪又係創新高！」注意，一年前同現時情況唔同，息口之後只會有加無減，樓宇供應增加，最重要係內地人嚟香港買樓嘅情況。
一年前，人民幣貶值勁，大陸資金要避貶、走資，一窩蜂來港買樓，炒起樓市。但現時人民幣貶值壓力減低，內地加強資本管制，銀聯落閘，嚴打走資，加上香港政府出辣招，內地人仲可唔可以繼續撐起樓市？現時個情況好大可能係等呢浸購買力消化後，樓價就會陰跌，如果一個唔好彩，外圍政局或股市有大震盪，樓價可能會急跌。
風吹知
https://www.facebook.com/windknows/