45歲嘅姚瑩瑩91年同靚靚袁詠儀一齊參選環球小姐，仲成為好朋友，之後靚靚就引薦佢嚟到香港發展，唔經唔覺都已經係26年前嘅事。咁多年嚟姚瑩瑩一直喺大台拍劇，雖然都係配角居多，但係當中有唔少角色令人印象深刻。95年加入大台藝員訓練班嘅佢，雖然有同學可以彈上一線，但其實喺同期同學中都仲有唔少實力派被投閒置散，同樣地都只可以一路做配角默默耕耘。
要講到同期同學之中最成功嘅都可以算係滕麗名，同陳奕迅楊千嬅同屆參加新秀歌唱大賽嘅佢入咗大台訓練班之後好快就被重用擔任女主角，同當家花旦關詠荷、蔡少芬一齊演出嘅《陀槍師姐》更加係大受歡迎，陳三元一角可謂街知巷聞。
嫁咗俾錢嘉樂仲有兩個可愛囡囡嘅湯盈盈，當年亦都係滕麗名、姚瑩瑩嘅同學，不過佢就冇滕麗名咁好彩，出道多年都係做配角，而且因為外形關係演出嘅角色唔係狐狸精就係二奶，直至2005年喺《阿旺新傳》扮醜女李笑好先真正受觀眾歡迎，仲拎埋大台嘅最佳女配角獎。