華懋荃灣新盤全．城匯繼長實地產（1113）海之戀後開賣，兩房單位扣除所有優惠後實收550萬有找，同區海之戀兩房實收6xx至7xx萬，再比較新世界（017）的栢傲灣，造出荃灣一千萬一房單位的神奇呎價，一樣超額賣個清光，真是信不信由你。大家都是香港發展商，為何華懋賣樓要低市價15%，僅高於新居屋一般七折？賣出還不用補地價呢？計對以上情況，市場有幾種解讀：
1）荃灣太耐沒有新優質樓盤供應，而栢傲灣最早賣樓而且最為優質，吸引當時餓新盤已久的荃灣居民；海之戀質素較次，長實樓大家心中有數，但始終是地鐵上蓋物業，所以平極有限。最後推賣的華懋樓，傳統智慧都是質素無保證，加上就算向海單位，都要硬食高速公路嘈音，地點最差，所以定價因而有所不同。
2）曹劌論戰：一鼓作氣，再而衰，三而竭。現今說法即是：早賣早享受，遲賣平幾嚿。最強的購買力已被消化，後來者只可賣殘價。
3）樓市轉勢，華懋散貨，一街之隔越賣越平，大跌之先兆也。
4）華懋在後小甜甜年代後，想洗心革面造起品牌，繼將軍澳海翩匯後，實行薄利多銷，找金門這名牌承建商做主承建商，想令人留下華懋樓是優質及優惠的印象，打造一間「平價新鴻基」，有報道指，全．城匯將會是九七後收票最多的新樓盤。
華懋新樓洗脫舊朵
在用家立場，首選一定是呎價平，平均六百零萬有間兩房新樓，比起轉咗上山四十年樓的荃灣中心只貴百多萬左右，而且收樓質素有保證，承建商行內數一數二。作為投資者，華懋個朵實在太深入民心，豪景花園、富豪花園、花園城等均落後於大市，反而呎數最小的金獅花園，跑贏一眾大呎屋苑，但其超大窗台的奇則，都是街知巷聞。不過今次開價偏低加「呼吸plan」，即是有呼吸就可借到八成，難怪高層接受傳媒訪問談到未來加息會否嚇怕買家，他說買家只怕抽唔中買唔到，雖然一人三票是常識，入票數字應有水份，但收近2萬票，破97後紀錄又抵佢寸得起。
現時香港的政治法治環境，西方國家看在眼裹，最近出產埋政治犯，這應該是第三世界或發展中國家的產物，竟然在這「國際城市」出現。香港大多數人，經歷佔領後，無力感極重，只好耷低頭搵錢自求多福，等仔女大多兩年移民。中資從各方面入侵，避無可避，政治與經濟本為一體，太多人為及外來因素扭曲樓價。要再大升無人信，但大跌亦沒可能，中產或以下者，生活質素只會越來越下降，香港作為適合居住城市的排名只會越來越低。
郭釗
http://www.fb.com/heaology.edu
本欄逢周四刊出