【仙遊首爾(3)下回】韓國男團無韓國人　學撒嬌為做實驗？

【仙遊首爾(3)下回】
韓國男團無韓國人　學撒嬌為做實驗？

上回講到今年韓國樂壇有隊非韓籍K-Pop組合EXP EDITION喺四月出道，成員都嚟自紐約，包括隊長Frankie，成員Koki、Šime同Hunter，究竟點解佢哋有呢個idea？竟然！一切嚟自紐約哥倫比亞大學嘅一個實驗。

四個紐約男孩學韓國歌手撒嬌，話鬼咁難，要衝破心理關口。

學韓文都唔易，尤其文法上同英文完全相反。(EXP EDITION TV截圖)

對於組成冇韓國人嘅韓國組合，佢哋有冇一刻覺得怪呢？(EXP EDITION TV截圖)

佢哋都話冇，事關呢個組合嘅出現係有意義嘅。

喺2014年，該大學透過選拔賽揀出成員，將組合命名為EXP，即係Experiment(實驗)嘅意思。隊長Frankie解釋，「研究有分短期同長期目標，長期係講緊組合要紅得起，表演到世界各地，短期係拍紀錄片，紀錄冇韓國人嘅韓國男團點誕生，而目的係希望了解性別、粉絲、文化混雜嘅連繫性。」

基於呢個大前題，佢哋都唔覺得組成非韓籍K-Pop組合係奇怪，反而變得特別。而喺去年搬嚟首爾之後，改名EXP EDITION，標誌第二階段嘅旅程開始。

原來idea嚟自紐約哥倫比亞大學嘅一個實驗研究。(EXP EDITION TV截圖)

最初組合命名為EXP，即係Experiment(實驗)嘅意思，目的係研究性別、粉絲、文化混雜嘅連繫性。(EXP EDITION TV截圖)

一年前搬到首爾，改名EXP EDITION，標誌第二階段嘅旅程開始。(EXP EDITION TV截圖)

佢哋參考其他韓國男團，住埋一齊，培養兄弟情。而學做韓國人首先要學韓文，目前佢哋已經可以完全用韓文做訪問，但係Koki話最初覺得好難，難在文法上完全同英文相反，加上有敬語，有好多方法完結句子，更容易混淆。

講到難，學撒嬌都唔容易，尤其要衝破心理關口，Šime話紐約嘅男歌手都係行型格、性感路線，扮可愛、撒嬌完全係相反概念。Hunter都承認撒嬌有難度，尤其隊長Frankie有鬍鬚，要可愛仲難。所以，最初佢哋要上撒嬌堂，經過多番練習，o依家已經自然得多，佢哋補充，「只係我哋自己感覺自然！」

4月正式踏上K-Pop舞台，同其他韓國組合一樣上音樂節目。(EXP EDITION TV截圖)

點解佢哋身上要掛名牌？詳情請睇片！(EXP EDITION TV截圖)

由組成至今，終於能夠正式踏上K-Pop舞台，佢哋仲分享咗錄影趣事，詳情請睇片！

IG: @expedition.official
https://www.instagram.com/expedition.official/
Twitter: @exp_edition
https://twitter.com/exp_edition

記者：阿仙
攝影：峰、Neo
編審：Kaman

【仙遊首爾(1)】長板女神教Seflie 衣櫃收埋幾條短褲仔？
http://bit.ly/2weAyiu

【仙遊首爾(2)】港男變Oppa打排球 甘心受體罰門禁
http://bit.ly/2wiq0Pc