澳門9月中舉行新一屆立法會選舉，一海之隔嘅香港，都受呢場選舉影響，但唔係講緊個結果，而係中聯辦嘅擺位安排！
傳中央屬意王志民接任
坊間一直流傳，中聯辦主任張曉明（圖）會升官，北上接王光亞個位做港澳辦主任，由於一直未有動靜，令部份人質疑，小明升呢係咪有變數？八方聽聞實際只係時辰未到，皆因中央屬意接任張曉明個位嘅人選，係澳門中聯辦主任王志民，盛傳中央等澳門過埋立會選舉後盡快宣佈兩人職務調動。
王志民過去在港時長期主管青年工作，中央點解屬意佢接掌中聯辦？明顯都要加強香港青年「教育」。
至於張曉明，雖然坊間時有評論講到佢升呢有危機，但據聞主席習近平對佢不知幾讚賞，尤其7.1訪港安排，予以高度評價，幫「第一夫人」彭麗媛打造埋親民形象喎，仲唔雙重加分？
至於話小明縱容梁班子搞到香港立立亂，仕途有暗湧，小明早前一句「彩虹總在風雨後」，仲唔係語帶雙關預示仕途一片光明？至於「風雨」邊個有份造成？路人皆見！