天鴿成功衝破李氏力場，雖則港股全日停市，但港交所（388）職員都唔係個個放假，將軍澳數據中心就需要風雨不改，全天候運作，港交所噚日下晝就喺微信出po𠱁同事。
港交所喺將軍澳有兩個數據中心，一個係做街外客生意，幫人托管設備，另一個就係交易所自家旗下所有市場交易同結算系統運作。打風時，當值職員要解答設備託管客戶查詢，又要預備颱風一走重新開市，咪話唔緊張。多得呢班手足，交易系統過去10年運作率達到百分百。
若果有風打到嚟，數據中心就會安排特別更表，保持足夠人手運作之餘，亦確保職員安全返工放工。員工餐廳打風暫停營業，但港交所都會提供颱風膳食津貼。
不過打風始終都有危險，港交所除咗冧自己同事，不忘讚打風下要工作嘅打工仔都係無名英雄，為城市付出！