雖然香港馬圈多數賽駒都係閹咗變晒公公，冇咗生殖能力，但都有極小量賽駒可保住雄風之餘，仲贏到唔少大賽，上季就有匹兩奪一級賽冠軍的「喜蓮獎星」，年份遠少少，亦有匹2013年一級賽香港盃及打吡雙料盟主「事事為王」。
「事事為王」喺2014年在高伯新馬房退役後，其馬主潘蘇通就安置呢匹馬去咗旗下澳洲Goldin牧場，挾「杜拜威」之子的尊貴身份，成為澳洲種馬之一。
如今事過境遷，「事事為王」在這三年間已與眾多佳麗交合，並誕下唔少子嗣，其子嗣平均身價亦有35,500澳元（折合約22萬港元），故配種費亦慢慢上升至16,500澳元（折合約10萬港元）。
「事事為王」嘅第三批後裔亦於呢個月相繼出世，如果之後有馬主引進呢匹馬啲小朋友嚟香港出戰，相信會係一時佳話。
圖片來源：Goldin牧場