星級分析師陸東舊年將自己親生仔──陸東資產管理（Look's Asset Management）賣畀金融界人士沈嘉奕後，雖然唔再係大股東，但都有留喺度做生招牌，不過今年4月跳槽去投融長富（850）做首席投資總監後，陸東資產管理再冇陸東了。
華華新近發現，陸東資產管理上星期向公司註冊處申請改名，今個星期一生效，究竟叫咩名呢？登登登凳，原來係剷咗個中文名，保留英文名，咁樣啲人就唔會誤會陸東仲喺度喇，而英文名Look's應該可以被重新演繹。
咁究竟Look's Asset Management近排有乜搞作呢，原來已有兩隻fund，一隻叫Great Win SPC，集中併購機會；一隻叫Look's房地產機會基金，集中日本度假租賃與短期住宿，食正日本2020年奧運機會。
話時話，下星期一投融長富會開股東會（AGM），陸東雖未入董事會，唔知會否現下身呢？