政府硬銷高鐵一地兩檢，唔少經常返內地做生意嘅商界人士鼎力支持，好似本身係全國政協委員嘅廠商會永遠名譽會長施榮懷（圖），日前返內地公幹，先後到江蘇、南京等地，原本買好機票昨午飛返香港，前日知道天鴿襲港，即刻變陣上網買高鐵車票，改由鄭州去深圳，結果好彩過林鄭，用咗8個鐘車程，換嚟唔使滯留多一日。
八方問過阿施，佢話如果唔搭高鐵，揸車要成18個鐘頭，又自爆有畏高（高人都畏高？），鍾意搭高鐵多過飛機。佢除咗讚搭高鐵唔似搭飛機會受颱風影響，亦親身試驗喺高鐵車廂上facebook，發帖話：「香港冇工開，仲唔乘機在內地玩吓facebook」，仲話連入咗隧道都收到電話，車程一啲都唔悶。瞓晒身宣傳，林鄭仲唔搵佢做高鐵一地兩檢宣傳大使？