40歲嘅美國不敗拳王美韋達（Floyd Mayweather）周六會喺美國拉斯維加斯，同29歲嘅愛爾蘭格鬥拳手麥基格（Conor McGregor）上演大戰，二人已經身在拉斯維加斯，喺周二各自出席活動。有傳美韋達打算會落注500萬美元（約3,900萬港元）喺自己身上，買自己周六打贏麥基格。
退役又復出之前，美韋達保持49戰全勝紀錄，周六大戰佢亦被外國莊家睇好，列佢為1.25倍大熱，而麥基格勝出就有四倍。如果美韋達真係買自己贏，其實都只係贏得125萬美金，對佢嚟講真係濕濕碎。
美韋達同麥基格周二喺拉斯維加斯出席活動，雖然遲到咗成個半鐘，但似乎依然相當受歡迎，被問到周六場拳，麥基格信心十足咁回應：「我深信會喺第一回合就打低佢。」仲寸美韋達喺大戰前唔敢同佢面對面碰頭。至於美韋達就冇佢咁好氣，有兩位啤酒女郎傍住去咗周六拳賽場館，佢一樣咁有信心，豪言生涯第50勝冇走雞。