【天鴿橫掃】
【本報訊】「今次乜都冇晒！住咗50幾年嚟未見過（水漲）咁犀利！」十號風球之下加上天文大潮，屬於低窪地帶的鯉魚門成為重災區，當中馬環村更在一瞬間變成澤國。有居民清晨一打開前門，赫見用石躉樁柱建在石灘上的400方呎露台遭海浪吞噬，4米高巨浪更加接連湧來，幾乎將村民捲走，驚險萬分，幸大批消防員及時趕至營救才撿回性命。有附近食肆預早將60個沙包叠在店外，但仍不敵巨浪，海水直湧入店舖內，損失慘重。
記者：劉柏麟
重災區之一的鯉魚門，昨受颱風影響，碰巧初二大潮，導致海水倒灌，該區嚴重水浸，岸邊大浪冚來，高達4米，海水如瀑布湧入街內及住宅。在鯉魚門海傍道，水深及膝，不少店舖被水淹浸，部份更停電停水，損失嚴重，居民要小心翼翼涉水而行。在馬環村，橫街窄巷在暴風雨下頓成小河，消防員帶備救生衣等入屋搜索及疏散居民。
「住咗50幾年，乜都冇晒」
一家四口住在馬環村50多年的陳先生表示，昨早7時許，水漲情況仍不算嚴重，但不到一個小時已發展到一發不可收拾，「大浪冚過我間屋（1樓），去到2樓咁高」。他一打開通往露台的前門，發現以石躉樁柱建在石灘上的400方呎露台已被打塌，露台簷篷、傢俬、單車等一併被海浪捲走，面向露台的前窗也被打爆，海水瞬即湧入屋內，水深達半米，雪櫃、家具全被浸濕，估計損失數十萬元。
陳先生指，消防員將其90多歲母親救走，自己及其餘兩名家人也立即收拾細軟離開「危樓」，他指颱台來臨前已做好準備，封好門窗，估不到今次威力那麼大，「住咗50幾年，未試過（水漲）咁犀利，所有嘢浸晒，乜都冇晒」。
同樣住在馬環村10多年的黃女士稱，「啲水一下子湧入嚟，好驚，唔知間屋會唔會冧，即刻打999，由窗外爬出去逃生」。她指「原本見風浪平靜，但估唔到大浪一嚟，走都走唔切」。她指單位兩年前才裝修過，今次可能要再花錢維修。
茶餐廳東主叠60沙包抗洪
在海旁道經營茶餐廳的李女士亦指，昨早7時許返舖執拾，用60個沙包堆於門外，但也不敵來勢洶洶的洪水，「海水湧得好急，1分鐘已經成間舖浸晒」，所有器具被浸爛，損失不菲。消防員入村後，用繩索、救生衣拯救被困的居民，其間洪水不斷湧入，消防員一度要站在高處躲避。
風雨過後，鯉魚門滿目瘡痍，部份居民要在家門外搭木板做橋，才能入屋，他們只望盡快將修補破損，重回正常生活。