為了爭購$1筍貨，2017腦場電腦節開幕前5日就已有兩路人馬在深水埗高登、黃金門外排隊。不過天氣不似預期，熱帶氣旋「天鴿」來勢洶洶，預計8月23日開幕的2017腦場電腦節好有機會會撞正「8號波」，瞓咗幾日街的朋友又可唔可以如期搶到$1筍貨呢？主辦單位「香港電腦業協會」剛剛公佈腦場電腦節在打風下的安排，如果8月23日上午6時前已取消所有熱帶氣旋警告信號，開幕儀式同$1瘋狂大搶購將會按原有計劃舉行，不過這個可能性就不大。
至於如果8月23日上午8時前改發3號風球或以下，開幕儀式仍會在當日中午12時舉行，但$1瘋狂大搶購活動則會由8月23日順延至8月25日早上9時進行。假如8月23日上午8時仍舊是8號風球或以上，$1瘋狂大搶購活動仍會順延至8月25日早上9時舉行，腦場電腦節開幕儀式亦會延至8月25日下午4時舉行。
不過對已排緊隊或諗住排隊等搶$1筍貨的朋友又點安排？大會話會為在8號烈風或暴風信號發出前排緊隊的人士登記及派籌，但這張籌並非直接可在8月25日早上舉行的瘋狂大搶購活動中使用，只係作為8號風球取消後兩小時內重新排隊的次序，即係話要比原定時間排多兩日隊先可以參加搶購活動！大會表示如再有特別安排的話，會在「腦場電腦節」Facebook專頁上公佈，並且會電話通知已登記的人士！
「腦場電腦節」Facebook專頁：IT.Fest@facebook
2017腦場電腦節資料
日期：8月23日至8月29日
時間：上午11:00至晚上10時
地點：深水埗黃金電腦商場、高登電腦中心、新高登電腦廣場
記者：布偉倫